O‘t qopi (jigar ostida joylashgan kichik a’zo) hazm jarayonida muhim rol o‘ynaydi — u o‘t suyuqligini yig‘ib, uni yog‘larning parchalanishida ishlatadi. Agar o‘t qopi faoliyati buzilsa, ovqat hazm qilish sustlashadi, ichda og‘irlik, ko‘ngil aynishi, hatto o‘t toshlari shakllanishi mumkin.
Keling, o‘t qopini sog‘lom saqlash uchun oddiy, ammo samarali odatlar bilan tanishamiz
1. Me’yorida va vaqtida ovqatlaning!
Ovqatni o‘tkazib yuborish yoki uzoq vaqt och yurish o‘t suyuqligining turg‘unlashuviga olib keladi. Bu esa o‘t toshlari paydo bo‘lish xavfini oshiradi.
Kunda kamida 3-4 mahal, oz-ozdan, muntazam ovqatlanish eng to‘g‘ri yo‘l.
2. Yog‘li ovqatni me’yor bilan iste’mol qiling!
O‘t qopi aynan yog‘lar hazmida ishlaydi, shuning uchun to‘liq yog‘siz dieta ham foydali emas.
Ammo ortiqcha yog‘li, qovurilgan, fast-fud mahsulotlari o‘t yo‘llarida yallig‘lanish chaqiradi.
Eng to‘g‘risi — zaytun, zig‘ir, kungaboqar yog‘i kabi tabiiy o‘simlik yog‘larini me’yorida ishlatish.
3. Har kuni sabzavot va meva yeying!
Tolali mahsulotlar (karam, sabzi, olma, bodring, lavlagi) o‘t suyuqligini tabiiy chiqarishga yordam beradi.
Ayniqsa, achchiq lazzatli sabzavotlar (rukola, petrushka, shivit, achchiq karam) o‘t ajralishini faollashtiradi.
♀️ 4. Harakatda bo‘ling!
Harakatsizlik (sedentar turmush tarzi) o‘t yo‘llarida suyuqlik turg‘unlashuviga sabab bo‘ladi.
Har kuni kamida 30 daqiqa piyoda yurish, yengil mashqlar yoki yoga o‘t qopi faoliyatini yaxshilaydi.
5. Yetarli miqdorda suv iching!
O‘t suyuqligining tarkibi qisman suvdan iborat. Suv yetishmasa, o‘t quyuqlashadi va oqimi qiyinlashadi.
Kunda 1,5–2 litr toza suv ichish — o‘t tizimi uchun eng oddiy va tabiiy yordamdir.
6. Keskin dietalardan va och yurishdan saqlaning!
Tez vazn yo‘qotish yoki uzoq och yurish natijasida o‘t qopida suyuqlik to‘planib qoladi.
Agar parhez tutayotgan bo‘lsangiz, uni asta-sekinlik bilan amalga oshiring, oqsil va sog‘lom yog‘larni butunlay cheklamang.
7. Vaqti-vaqti bilan shifokor ko‘rigidan o‘ting!
Doimiy o‘ng qovurg‘a ostida og‘riq, og‘irlik yoki achishish sezsangiz, bu o‘t qopi yoki jigar faoliyatidagi muammolar belgisi bo‘lishi mumkin.
Ultrasonografiya (UZI) tekshiruvi orqali o‘t toshlari yoki yallig‘lanishning oldini olish mumkin.
Xulosa qilib aytganda , o‘t qopi sog‘lom ishlashi uchun muntazam ovqatlanish, harakat, to‘g‘ri yog‘ tanlash va suv ichish odati — eng muhim omillardir.
Organizm o‘zining tabiiy ritmida ishlasa, hazm tizimi barqaror, energiya esa yuqori bo‘ladi.
Qashqadaryo viloyati sog`liqni
saqlash boshqarmasi matbuot xizmati