MAGNIY INSON ORGANIZMIGA NIMAGA KERAK?
Magniy — bu inson organizmi uchun hayotiy muhim mineral bo‘lib, u 300 dan ortiq biokimyoviy jarayonlarda ishtirok etadi. Uning tanadagi ahamiyatini shunday qismlarga ajratib tushuntirish mumkin:
1. Asab tizimi uchun
Magniy asab impulslarini tinchlantiradi, stress va asabiylikni kamaytiradi. U serotonin (baxt gormoni) ishlab chiqilishiga yordam beradi, shu sababli uyquni yaxshilaydi va depressiyani yengillashtiradi.
Magniy yetishmasa — odam tez jahldor, asabiy, uyqusiz bo‘ladi.
❤️ 2. Yurak va qon tomirlar uchun
Magniy yurak urishini me’yorda ushlab turadi, qon tomir devorlarini bo‘shashtiradi va qon bosimini pasaytiradi.
Shuningdek, u xolesterin almashinuvida ishtirok etib, yurak xurujining oldini oladi.
Yetishmovchilik — yurakda sanchuvchi og‘riq, aritmiya, bosim o‘zgarishi bilan namoyon bo‘ladi.
3. Mushak va suyaklar uchun
Magniy mushaklarning qisqarish va bo‘shashish jarayonini boshqaradi.
Shu sababli, ayniqsa oyoqda tunda tutqanoq (sudorgi) bo‘lishi magniy tanqisligidan dalolat beradi.
U, shuningdek, suyaklarda kaltsiyni to‘g‘ri “joylashtirishga” yordam beradi, ya’ni suyak mustahkamligini oshiradi.
4. Energiya ishlab chiqarishda
Magniy hujayralar ichida ATP (energiyaning asosiy manbai) sintezi uchun zarur.
Ya’ni u charchoqni kamaytiradi, jismoniy va aqliy faollikni oshiradi.
5. Qand almashinuvi va insulin uchun
Magniy insulinning to‘g‘ri ishlashini ta’minlaydi, shu bois qandli diabet xavfini kamaytiradi.
Magniy kam bo‘lsa, hujayralar insulin ta’siriga nisbatan sezuvchanligini yo‘qotadi.
Magniy manbalari: Yong‘oqlar (bodom, yeryong‘oq, keshyu), don mahsulotlari (grechka, suli, jo‘xori), yashil sabzavotlar (ismaloq, brokkoli), avokado, banan, kakao, qora shokolad, mineral suvlar
⚠️ Eslatma: Kofe, spirtli ichimliklar, stress, ortiqcha shirinlik va ayrim dorilar magniyni organizmdan chiqarib yuboradi.
Laziza Allayorova jurnalist