Маълумки, Президентимизнинг 2021 йил 26 июлдаги «Аҳолига кўрсатилаётган тиббий ёрдам сифатини янада яхшилаш чора-тадбирлари тўғрисида»ги қарори билан мамлакатимизнинг 35 та туман (шаҳар)ларида оғир ҳолатдаги беморларга «Олтин соат» тамойили асосида шошилинч ва сифатли тиббий ёрдам кўрсатишга ихтисослашган туманлараро қўшма шикастланишлар ва ўткир қон-томир касалликлари марказларини ташкил этиш белгиланган эди.
Шунга кўра, Қашқадарё вилоятининг Шаҳрисабз шаҳри ҳамда Касби ва Ғузор туманларида ана шундай Марказлар фаолияти йўлга қўйилди.
Вилоят соғлиқни сақлаш бошқармаси томонидан ташкил этилган пресс-турда бир гуруҳ журналист ва блогерлар Ғузор туманлараро қўшма шикастланишлар ва ўткир қон-томир касалликлари маркази фаолияти, у ерда беморларга тезкор ва сифатли тиббий хизмат кўрсатиш учун яратилган шарт-шароитлар билан танишди.
— Марказимиз Деҳқонобод, Ғузор ва Қамаши туманлари аҳолисига хизмат кўрсатади, — дейди Ғузор туманлараро қўшма шикастланишлар ва ўткир қон-томир касалликлари маркази раҳбари Мунира Нурхонова. — Аввал бу ҳудудлардаги аҳоли шошилинч тиббий ёрдам зарур бўлганда асосан Қарши шаҳрига боришга мажбур бўлар ва у ерга етиб боргунига қадар жуда кўп вақт йўқотиларди. Эндиликда бундай ҳолатда бизнинг марказимизга мурожаат этишмоқда ва натижада йўл учун сарфланадиган дақиқаларни бир неча баробар қисқартириш имконига эга бўлишяпти.
Албатта, тиббий соҳада замонавий технологияларнинг аҳамияти жуда катта. Шунга кўра, Ғузор туманлараро қўшма шикастланишлар ва ўткир қон-томир касалликлари марказига ҳам тегишли дастурлар доирасида 34 турдаги, умумий нархи 13 миллиард 881 миллион 750 минг сўмлик тиббий аппаратлар олиб келинган. Ушбу технологиялар ёрдамида турли хилдаги оғир тан жароҳатлари, қон-томир касалликлари билан келган беморларга тезкор ташхис қўйиш ва жарроҳлик ёки бошқа зарур тиббий амалиётларни ўтказиш имкониятлари мавжуд.
— Биргина рақамли рентген аппаратини оладиган бўлсак, Францияда ишлаб чиқарилган технологиянинг имкониятлари оддий рентген аппаратларидан кескин фарқ қилади, — дейди радиолог Икром Қурбонов. — Масалан, ушбу аппарат 130 градусгача айлана ҳаракатни амалга оширади ва беморни ҳаракатлантирмасдан туриб ҳам унинг барча тана аъзоларини рентген қилиш имконини беради. Қолаверса, бу технология ўзининг юқори даражадаги тасвир аниқлиги билан бошқаларидан ажралиб туради. Бундан ташқари, кўчма рентген аппаратимиз ҳам бор ва унинг ёрдамида ўта оғир ҳолатдаги беморларни у ётган хонага бориб ҳам рентгенга тушириш имкони мавжуд.
Президент қарорида ўткир ва сурункали буйрак етишмовчилиги мавжуд беморларга гемодиализ хизматини кўрсатиш ҳам ушбу марказларнинг асосий вазифаларидан бири этиб белгиланган эди. Шунга кўра, Ғузор туманлараро қўшма шикастланишлар ва ўткир қон-томир касалликлари марказида ҳам гемодиализ бўлими ташкил этилган бўлиб, бўлим барча замонавий технологиялар билан жиҳозланган.
— Буйрак етишмовчилигидан азият чекаётган беморлар ҳар икки кунда гемодиализ хизматига эҳтиёж сезади, — дейди врач Илҳом Сафаров. — Аввал Ғузор ва дейлик, қўшни Деҳқонобод туманидаги шундай беморлар ҳам ойига 12, 15 маротаба вилоят марказига қатнаган. Натижада йўл учун ҳам кўп маблағ сарфлашига тўғри келган. Қолаверса, бундай хизмат кўрсатадиган шифохоналар камлиги боис, уларда узундан-узоқ навбатлар пайдо бўлар, ўз вақтида ва сифатли тиббий хизмат кўрсатиш имкони камайиб кетарди. Бугунги кунда эса ҳудуддаги беморлар Марказимизга келиб, шу ернинг ўзида гемодиализ олишмоқда.
Яна бир жиҳати, жорий йилнинг февраль ойидан Марказда миниинвазив лапароскопик операциялар қилиш ҳам йўлга қўйилиб, ўтган қисқа вақт мобайнида 18 нафар беморда шу турдаги тиббий амалиёт бажарилибди. Илгари бундай амалиёт учун беморлар асосан, пойтахтга ёки хориж давлатларига боришган бўлса, бугун чекка ҳудудлардаги шифохоналарда ҳам бундай имкониятлар яратилаётгани эътиборга молик.
Манбаа халқ сўзи газетасидан олинди.